sabaoi
المشاركات : 5 14/10/1985 العمر : 38 0 عدد النقاط : 5 سجل في يوم : 11/12/2008
| موضوع: مسرحية قصر الرئاسة الأربعاء أبريل 06, 2011 12:10 am | |
| مسرحية قصر الرئاسة
مقدمة
تدور المسرحية في قصر رئاسة جمهورية عرب ستان ، حيث الشعب ثائر ضد الرئيس بن مبروكة الجالس في الحكم لما يزيد عن ربع قرن والراغب في توريثه لابنه السيد / كمال.
الفصل الأول
المشهد الأول
المكان :مكتب الرئيس
الزمان : الخميس 10 فبراير الرابعة عصراً
الأشخاص : الرئيس بن مبروكة و عن يمينه الجنرال : حسن الدمنهوري قائد قوات الدفاع ، وعن شماله الدكتور/ عصام البدري ، أمين الحزب الوثني.
الجنرال : يا ريس الجيش عمل اللي عليه بس الشعب كله ثاير ضدك واحنا مش هنقدر نصمد أكتر من كده.
بن مبروكة : يعني انت شايف إيه ؟؟
الجنرال : يا ريس الكلمة تقيلة على لساني ، بس إيه اللي رماك على المر.
بن مبروكة: قول يا دمنهوري ، انت عارف غلاوتك عندي.
الجنرال : أنا والدكتور عصام شايفين إن الجيش مستحيل هيضرب في الشعب ، وعشمنا في سيادتك تنهي المسألة.
بن مبروكة: أنهيها إزاي؟؟
الجنرال: سامحني يا ريس ، تقوم و تلقي على الشعب بيان تنحي.
بن مبروكة: تنحي ؟ - ويرتفع صوته – إنت واعي للي بتقوله
د/ عصام : يا ريس دا علشان مصلحتك ، لأن الثورة لو زادت عن كدا مش هنقدر نواجهها و سيادتك هتبقى في خطر.
بن مبروكه : آه دا إنتوا متفقين عليا.
الجنرال: والله أبداً يا ريّس ، الحكاية وما فيها خايفين عليك ، وخايفين البلد تفلت من إيدينا.
بن مبروكه : طب لما أشاور زهزهان و كمال.
د / عصام : بسيطة يا ريس ، معتقدش إنهم هيكرهولك السلام.
بن مبروكه يأمر الحارس باستدعاء كمال وزهزهان فيدخلان الحجرة على وجه السرعة.
زهزهان: خير يا ريس؟
بن مبروكة : الجنرال و د / عصام عايزيني أتنحى.
زهزهان تخبط على صدرها : يالهوي تتنحى ومستقبل العيال يضيع؟
الجنرال: محدش هيضيع ولا حاجة ، سلامة الريس وحضرتك والأولاد في رقبتنا.
د / عصام : يا ريس الوقت بيعدي ، والموضوع هيفلت ، أنا رأيي كفاية تأخيـر.
بن مبروكه يهز رأسه مستسلماً و زهزهان وكمال في ذهول.
المشهد الثاني
بن مبروكة في حجرة يسجل بيان التنحي ، في نفس الحجرة الجنرال والدكتور عصام يلتقطان الأنفاس ارتياحا ثم يخرجان ليعلنا أن الشعب سيسمع الليلة أخباراً مفرحة.
في حجرةٍ أخرى زهزهان ممسكة بالمحمول و بجوارها ابنها كمال.
زهزهان: ألو يا أنيس.
أنيس الفقري: ألو يا ماما وحشتيني.
زهزهان: و ده وقته يا منيل؟ اسمع اللي هقولهولك كويس.
أنيس : سامع يا ماما.
زهزهان: جايلك ظابط جيش ومعاه شريط خده منه و متذيعوش .. فاهم !!
أنيس : فاهم يا ماما ، هوا أنا أقدر أخالف أوامرك.
و بالفعل يتسلم أنيس الشريط و يخفيه ولا يذيعه.
المشهد الثالث
بن مبروكه يسجل خطاباً كتبه ابنه كمال ، تقوم زهزهان بإرساله إلى أنيس الفقري ، و بالفعل يذيع هذا الخطاب بعد منتصف ليل الخميس 10 فبراير.
الفصل الثاني
المشهد الأول
المكان : حجرة نوم الرئيس.
الزمان : الساعة 2 بعد منتصف الليل أي قبل فجر الجمعة 11 فبراير.
الجنرال يطلب الإذن بالدخول. يدخل على الرئيس و يبدأ الحديث:
بقا هوا دا اللي اتفقنا عليه يا ريس؟
بن مبروكه : محصلش حاجه يا دمنهوري.
الجنرال: إزاي ياريس ، دا الشعب كله بدأ يتحرك ناحية القصر.
بن مبروكه : انت بتتكلم إزاي؟ مش إنتوا مسيطرين على الموقف؟
الجنرال: أنا مش جايب حاجه من عندي ، العالم كله بيذيع مشهد " الشعب قادم نحو القصر".
بن مبروكه يضغط على زر الريموت ويشاهد الشعب قادم نحو القصر ، يدخل في حالة ذهول ، يصرخ : الولا إبن ....... وأمه ودوني في داهيه ... طب والحل يا دمنهوري؟
الجنرال : ما قولنا من امبارح يا ريس.
بن مبروكه: خلينا في النهارده.
الجنرال: هوا نفس الحل بتاع امبارح يا ريس.
بن مبروكه: بس الكلمة تقيله على لساني يا دمنهوري.
الجنرال: بسيطه يا ريس ، نخلي النائب عمرو الزلمان يطلع يقولها بالنيابة عنك.
بن مبروكه: طب وأنا و زهزهان والعيال؟
الجنرال: في حمايتنا يا ريس ، دا انت من رموز ديسمبر.
بن مبروكه: ماشي خلاص موافق بس باقي شرط مهم.
الجنرال: أشرط يا ريس.
بن مبروكه : فاتح شرور و ثروت الرخيص و زكريا أزمه يفضلوا جنبك ، وتستعين بيهم ، و محدش يقرب لهم ، واللي أهم علي الدين شمس.
الجنرال: إزاي يا ريس؟ طب وكبير القضاه هنعمل فيه إيه؟
بن مبروكه : كبير القضاه !! دا أنا اللي جايبه دا الراجل بتاعي، تحب أكلمهولك؟
الجنرال: العفو يا ريس.
يقوم بن مبروكه بالاتصال بكبير القضاه .
بن مبروكه : ألو إزيك يا عبد الموجود؟
كبير القضاه: تمام يا ريس المهم حضرتك و رضاك.
بن مبروكه: أنا كويس بس الجنرال عايز يطمن إنك من رجالتي ، خد طمنه.
يتناول الجنرال السماعة و يطمئن من المستشار عبد الموجود على ما أكده بن مبروكه.
المشهد الثاني
صباح الجمعة 11 فبراير، زهزهان تأمر الخدم والخادمات بجمع التحف و تتجه هي و بن مبروكه وكمال وعلي نحو الطائرة لل1هاب إلى منتجع مرتع الشيوخ.
الجنرال يستدعي السيد / عمرو الزلمان لتسجيل خطاب تخلي، إذاعة الخطاب مساء الجمعة 11 فبراير.
المشهد الثالث
مكتب قصر الرئاسة مساء الجمعة 18 فبراير.
الجنرال و فاتح شرور و ثروت الرخيص و زكريا أزمة يتحدثون.
الجنرال: والعمل؟ ده النهارده الشعب كله ثاير و جه الشيخ العقباوي و زودها.
ثروت : مفيش مشاكل يا جنرال.
الجنرال: مفيش مشاكل ازاي هوا انت مبتشوفش؟
فاتح شرور: كلنا شوفنا يا فندم ، بس برضه عندنا تصريفه.
زكريا أزمه: بعد إذن سيادتك إسمعنا و بعدين قول اللي انت عايزه.
الجنرال: أديني سامع لما أشوف هتودونا فين.
شرور: شوف سيادتك الملايين دي حاولنا نفضها بالعنف و منفعش ، معتش قدامنا غير الحيله .
زكريا أزمة : يعني سيادتك لو قدرنا نخرج الأشقاء المستسلمون مش دا هيأثر؟
الجنرال: طب والباقي؟
ثروت: و برضه هنفتت التلف و مشايخهم.
الجنرال: طب و الباقي؟
ثروت: الإعلام هيشتغل يا فندم.
الجنرال: طب يا فالحين ، قولوا هتخرجوا دا كله ازاي؟
فاتح شرور: مفيش إحنا هنتصل بمكتب إعداد الأشقاء المستسلمون ، نعرض عليهم عرض كويس جداً و نلبي ليهم طلب ياما طلبوه، و منفذناهوش أبداً.
الجنرال: إيه هوا ؟
زكريا أزمه : الإفراج عن جودت الخايب و حسين ملاك.
الجنرال: طب و التلف هنعمل فيهم إيه؟
ثروت: بسيطه يا فندم الإعلام بعد كدا هيستضيف كام ليبرالي مشارك في الثورة و يسأله عن المادة التالتة في الدستور، هتلاقي التلف و مشايخهم هاجوا وماجوا وفي ثانية بقوا ضد الثورة.
شرور: آه منك يا ثروت يا لئيم.
ثروت: تلميذك يا د كتور.
شرور: تلميذي ولا تلميذ العوالم؟
الجنرال: و تفتكروا إن ده كفاية؟
زكريا أزمة: لا يا فندم ، الإعلام و تخويف الناس على أرزاقها والحالة اللي نايمه والأمن اللي مش موجود كل دا لازم يأثر.
الجنرال: نجرب ، قال على رأي المثل ، خليك ورا الكداب.
الفصل الثالث
المشهد الأول
نفس المكان : السبت مساء 19 فبراير
فاتح شرور و زكريا أزمة وممثل عن مكتب إعداد الأشقاء المستسلمون.
شرور: أهلاً و سهلاً
ممثل المكتب: لا أهلاً ولا سهلاً ، من إمته انتم أهلنا؟ أنا جاي أقابل الجنرال مش جاي أقابلكم.
زكريا أزمه: حلمك علينا ، الجنرال جاي حالاً.
يدخل الجنرال و يلقي السلام ، فيرد ممثل مكتب الإعداد: وعليكم السلام ، أنا جاي نيابه عن مكتب الإعداد.
فاتح شرور: إحنا عارفين قد إيه عذبناكم و بهدلناكم ، بس برضه عارفين قد إيه إنتم محتاجين جودت و ملاك، واحنا دلوقتي موافقين نخرجهم.
الممثل: كده ببلاش؟ عمركم ما عملتم حاجه بدون تمن.
فاتح شرور: طبعاً في تمن بس التمن لينا و ليكم.
الممثل: عمر ما كان اللي لينا ليكم ، طول عمر مصالحنا متعارضه.
فاتح شرور: بس النهارده الوضع اختلف.
الممثل: إزاي؟؟
فاتح شرور: في مرحلة جديدة و عربستان جديده وانتخابات جديده.
الممثل: كمل.
فاتح شرور: يعني هنعمل لجنة تعديلات دستورية تخدم مصالحنا و مصالحكم.
الممثل: كمل يا دكتور.
فاتح شرور: يعني هنعمل تعديلات تفصيل ، وانتخابات سريعه نسيطر احنا الاتنين بيها على البلد.
الممثل: طب و الرياسه
فاتح شرور: لما ييجي وقتها ، لكل حادث حديث.
الممثل: طب وتشكيل اللجنة هيبقى إزاي؟
فاتح شرور: هات واحد من عندك معندناش مانع.
الممثل: واحد بس مش كفاية لازم رياسة اللجنة تبقى تبعنا.
فاتح شرور: بس دي هتبقى مفضوحة أوي.
الممثل: مش لازم واحد منننا بس ممكن واحد فكره فكرنا.
فاتح شرور: زي مين؟
الممثل: المستشار / ساقط العمري.
فاتح شرور: كده اتفقنا، حتى محدش هيشك في أي حاجه.
الممثل: و باقي اللجنه؟
فاتح شرور: ياسيدي هنجيب ناس محترمه و مشهود لها.
الممثل: زي مين؟
فاتح شرور: الدكتور رائف الحداد ، المجلس هيتصل بيه وده راجل محترم وهيعمل المطلوب في حدود اختصاص اللجنه.
الممثل: ومين تاني؟
فاتح شرور: المستشار: كاتم تاتو ، وده راجل بتاعنا ولسه قريب مفصل قانون الختان علشان ماما زهزهان.
الممثل: وهتعمل إيه مع التيار التلفي؟
فاتح شرور: ثروت دلوقتي بيسخنهم علشان المادة التالته.
الممثل: إتفقنا.
المشهد الثاني
اللجنة منعقدة بتوصيات محددة وعايزين مادة تفصيل تريحنا من الدكتور أحمد سلسبيل ، وتتم التعديلات و يوافق عليها كما هو مخطط للأمر.
المشهد الأخير
المشهد ده هوا بكره و بكره ميعرفوش غير ربنا ، اللي قال في كتابه العزيز : " و قد مكروا مكرهم وعند الله مكرهم ، وإن كان مكرهم لتزول منه الجبال" ، و قال في موضع آخر: " و يمكرون و يمكر الله والله خير الماكرين" ، و يقول في موضع ثالث : " و نريد أن نمُن على اللذين استُضعفوا في الأرض و نجعلهم أئمة و نجعلهم الوارثين و نمكن لهم في الأرض و نري فرعون وهامان وجنودهما منهم ما كانوا يحذرون" . و الشعوب دائماً هم المستضعفون ، وهم وحدهم القادرون على كتابة المشهد الأخير مهما فعل الجبارون.
كانت هذه المسرحية حلم رآه واحد بيحب عرب ستان فيها الكثير من الأشياء التي ربما لن تُعجب مفسري الأحلام ، وهو يسألكم نعم هذا حلم ، لكن أين الحقيقة.
الـــــــمــــــــصـــــــــدر
الكاتب/
عبد العزيز شرباص
| |
|
star times šŧдя Ŧΐмэš
المشاركات : 6828 01/09/1990 العمر : 33 WWW.ShAbAb51.Yoo7.COM طالب 16 عدد النقاط : 18929 سجل في يوم : 13/11/2008
شًِْـِِّغًـِِّآل شًِْـِِّغًـِِّل عًٍـِِّآلـِِّيَ آوٍيَ: (100/100)
| موضوع: رد: مسرحية قصر الرئاسة الأربعاء أبريل 06, 2011 9:32 pm | |
| كوميديا ساخرة لما يحدث فى مصر
مشكوووووووور ليك
| |
|
Admin
ŁőяĐ ŏƒ мσνίёş
المشاركات : 4141 10/05/1989 العمر : 35 http://shabab51111.yoo7.com 9 عدد النقاط : 16868 سجل في يوم : 09/05/2008
شًِْـِِّغًـِِّآل شًِْـِِّغًـِِّل عًٍـِِّآلـِِّيَ آوٍيَ: (100/100)
| موضوع: رد: مسرحية قصر الرئاسة الأربعاء أبريل 06, 2011 9:54 pm | |
| الف الف شكر
استاذ عبد الحميد
نورت المنتدى
| |
|